本文重點
上周國美（00493）主席兼總裁陳曉向外講過公司未來五年大計，佢話為咗重建外界對國美嘅信心，會與前創辦人黃光裕劃清界線。但太子尋日睇通告，公司董事會通過，陳曉辭去總裁一職，只留任主席，公司執行副總裁王俊洲委任為總裁，昨日起生效。公司轉頭卻起用黃光裕舊部屬王俊洲任總裁，此舉就引起市場各種嘅揣測。
王俊洲升任總裁
據公司解釋，分開主席同總裁職位，可以進行強化管理效率。太子知道，根據上市規則嘅企業管治要求，公司主席及總裁職責要分開，最好唔好同一人擔任。
相信好多人都知，現任主席兼總裁陳曉臨危受命，接手代理主席一職，同副總裁王俊洲為首嘅高管並肩作戰，共同面對黃光裕事件、金融海嘯等風風雨雨，又要周圍搵錢還債，好彩吉人天相，喺陳曉同王俊洲帶領下，引入咗貝恩投資，仲解除咗債務危機，重振國美聲威添。
依家國美發展已經逐漸恢復正軌，今後陳曉就主要負責公司戰略嘅策劃同埋執行效果嘅評估，王俊洲則負責公司戰略嘅推進同負責實施結果，即係話今後兩人分工合作。