橙色制服十足荷蘭隊

為咗迎合世界盃，港燈早排就用「踢出世界波」做主題，搞咗個義工隊重組六周年活動，嘉許優秀員工及部門。太子一早聽講曹生係足球迷，佢話當日一見到活動會場布置，加埋個個義工都拎住唔同國家嘅國旗，爭啲就以為自己去咗南非；佢仲話嗰日成班義工都着晒橙色制服，出去服務嗰陣好易畀人誤會係荷蘭隊喎。

除咗活動之外，港燈向每名出席員工送嘅紀念品都好有心思，除咗有用足球做主題嘅襟章，仲有特別設計嘅計步器，有紀念價值之餘，仲可以鼓勵同事做多啲運動。

曹生同太子講，做義工其實同踢波差唔多，除咗要有技術、戰術及團隊精神之外，義工們嘅全情投入都好重要，佢仲話希望今年可以多啲親身參與，與同事們一齊關心社會上有需要嘅人喎！