由於周一升市主要由補倉盤主導，若短線外圍市況整固後再上，話唔定補倉潮未完，故即使睇唔通後市，計阿莊話，寧願唔做唔錯，亦唔好心急開淡倉。
昨日同一位中資賓架吹水，講開即將展開香港IPO活動嘅農業銀行（01288），呢位仁兄話，近日中央透過人行發功，拋出匯改話題，刺激股市回升，選擇呢個時候做嘢，唔多唔少係順道為農行IPO做勢。
匯改似為農行造勢
不過，睇番近幾年上市嘅內銀股，○七年掛牌嘅中信銀行（00998）及去年掛牌嘅民生銀行（01988），現價仍低於招股價，點樣說服投資者長線投資風險較高嘅農行，實乃疑問，所以都未知點樣推銷客戶認購咁話！
講開中國匯改，人行進一步增強人民幣匯率彈性，並擬將人民幣結算境內試點擴大至二十個省市等一系列舉動，意味着人民幣將加快向國際化進程。
唔少本地銀行都磨拳擦掌，部署推出更多人民幣產品，如人民幣計價嘅保險、股票及基金產品。受惠呢項新發展，建議重點跟進工銀亞洲（00349），該股昨日股價創五十二周新高，收市報21.15元，中線目標向25元推進，穿19元止蝕。
中國澱粉醞釀破頂
西王糖業（02088）就中期業績發出盈喜，刺激股價急升超過一成，收市報2.05元。消息帶動同類股份走高，大成糖業（03889）股價升逾半成，收市報1.43元，不過成交並唔多，並非炒作對象。反而近年積極拓展澱粉糖業務嘅中國澱粉（03838），近周股價表現硬淨，一直企穩喺0.8元水平，似乎正在醞釀破頂，可以望多兩眼。
此外，近年主攻內銷市場嘅聯想（00992），本月上旬獲大股東聯想控股入場增持咗530萬股，平均價4.143元，持股量由42.96%增至43.02%，難怪股價回勇，昨日收市報4.63元，升4.28%，成交5.03億元。
隨着內地推動三網融合，聯想嘅電腦及手機業務協同效益可堪憧憬，加上喺內地市場嘅一哥地位穩固，估值可享一定溢價。
雖然以往績計，現價市盈率四十二倍，但去年度下半年盈利復甦勢頭明顯加快，本年度將得到全面反映，股價喺4元水平實在唔應該沽，而係跟住大股東一齊買！
戰報
環能國際（08182）
錢進本月十五日推介環能，股價昨日最高0.59元，較推介當日低位0.52元，升13.4%。
新華文軒（00811）
積奇本月十一日推介新華文軒，當日低位3.71元，昨日逆市高見4.3元，升幅15.9%。