資金輪流炒作，上周初藥業股炒高，但到咗上周五卻成沽售對象，反而燃氣股有買盤追捧，見北京控股（00392）曾升逾半成、華潤燃氣（01193）升2.69%、中油燃氣（00603）升5.68%，睇睇升勢可唔可以喺本周延續。
此外，上周五紡織股亦有異動，博下一個炒作板塊係水務股，可重點關注粵海投資（00270）、中國水務（00855）、北控水務（00371）及光大國際（00257）。
騰訊大撼大觀望為上
呢個月畀人質到走晒樣嘅騰訊（00700），上周五午後股價突然炒上，收報129.7元，升3.76%，成交額達32.3億元。依家圍繞騰訊嘅傳聞甚多，有指係內地收緊網遊相關產業嘅規管，又有指係與主要股東嘅場外衍生工具投資有關。無論如何，依家擺到明喺度大撼大，升跌都可以冇譜，都係隔岸觀火最自保。
持倉中，中國南車（01766）過去一個季度嘅股價表現相對硬淨，上周五收報5.62元，過去大半年嘅重要支持位5元關再次經得起考驗。歸根究柢，未來一、兩年公司業績將呈較快增長，現價計今、明兩年市盈率分別係二十四倍及二十倍，以一隻喺鐵路設備業擁有領導地位嘅股份而言，估值可享一定溢價，故見基金惜貨，阿莊倉底嗰廿萬股亦會繼續持有。
事實上，農村城鎮化以及陸續有新鐵路投入營運，將帶動南車嘅業務增長，但相關潛力尚未反映喺股價表現上。
去年上半年，南車業務受金融海嘯影響，但下半年已確認步出谷底，今年上半年業績將可提供更多數據支持業務復甦，建議繼續逢低收集，料年內股價可突破五十二周高位6.24元，止蝕位5元。
戰報
申洲國際（02313）
錢進於上周五推介的申洲國際，股價當日低位見過8.52元，最高升上9.14元，單日升幅有7.27%。
永保林業（00723）
May上周四推介的永保林業，周五繼續做好，股價一度升上0.52元，較推介當日低位0.475元，升9.4%。