日前債王格羅斯接受電視訪問，承認棄債投股，認為目前唔少優質上市公司股票估值極低，回報甚至媲美主權債券，債券獨當一面的日子也將過去，考慮進一步向股市投入銀彈。
債王以債券投資起家，一樣唔睇好債市前景，其實史提芬認為唔算意外。歐美政府為挽救經濟，齊齊濫用印鈔機，結果只有引發通脹一途，而歷史告訴我們，抵禦通脹，股票表現會遠遠好過債券。儘管已經歷過美國次按風暴洗禮，但近一年的中東及「歐豬」金融危機，受災區股市第二波跌幅依然相當驚人，年初開始以美元計算，阿聯酋股市跌13%、西班牙跌18%、希臘跌31%，是否市場過分悲觀，值得深究。
債王棄債唔出奇
再睇美股，經濟已逐漸從金融海嘯中復甦，標普五百指數一○年預期市盈率亦只係13.7倍，同過去二十年幾次大型調整市的低位睇齊，比平均估值20.4倍低三成三，如果問兩三年內股市向上機會大定向下機會大？顯而易見，債王棄債，只因形勢比人強。
早前市場傳出有關新奧燃氣（02688）主席王玉鎖的負面消息，儘管公司已快速作出澄清，但股價還是由月初的21元跌到最低的13.66元，市值蒸發近78億元，似乎民企的形象還未夠好，對每次傳聞都變得草木皆兵（近日騰訊（00700）又是一例），加埋碰啱月初跌市基金要錢唔要貨，這燃氣股龍頭只能嘆句「人言可畏」。
主席增持撐股價
權益披露顯示，傳聞主角主席王玉鎖上周四、五入市增持94萬股新奧，持股量由31.02%升至31.11%，力撐股價，消息正面，尋日股價反彈番上18元樓上。以燃氣供應覆蓋近八十個城市，接近500萬用戶的規模，筆者唔信一個管理層問題，會對新奧生意起到重大破壞。彭博資訊顯示，單是頭四大外資股東，揸貨經已拍住王玉鎖接近三成。
新奧一○年市盈率十六倍，以未來三年可保持兩成以上增長計，18元以下入貨風險應該唔大，尤其早前中央大幅調高氣價，相信下游供應商或遲或早宣布提價，燃氣股應有一次全面的反彈出現。