假期期間外圍市況向好，可惜昨日內地A股低收，影響港股氣氛，恒指全日波幅僅123點，收市報20,138點，升76.25點，大市成交488億元。唔少基金經理話，上個月沽咗貨冇咁快買番，依家都係睇「波」唔睇「股」，月底恒指定住喺2萬點水平做半年結都算唔錯！
趁市況回穩，炒家聚焦與指數表現無大關係嘅二、三線股炒作，本周初阿莊買入嘅文化中國傳播（01060）股價走勢對辦，昨日高見0.78元，收報0.76元，升5.56%，成交4,203萬元，且看今轉能否挑戰去年高位0.87元。
中資股方面，組合中嘅中國人壽（02628）近日股價亦重上水面，昨日收報34.85元。公司剛宣布今年首五個月嘅未經審核累計保費收入約1,549億元人民幣，同比增長6.39%。若短期股價能以大成交升穿35元，可望重現升勢。
大家樂異動要留意
昨日快餐股大家樂（00341）異動，午後買盤積極掃高至21.35元，收報20.6元，升6.63%。老實講，其現價往績市盈率近二十六倍，估值唔算便宜，但勝在往績穩步增長，加上業務性質穩定，係波動市中嘅避險對象，不過出現股價單日波幅達一成嘅情況就較為少見，係咪醞釀咩好消息，不妨多加留意。
另一隻值得一提嘅異動股係建滔化工（00148），股價自四月高位43.8元反覆回落，至上周見低位29.7元後才止跌回穩，基本上已成功考驗250日線30元承接，昨日收市報34.1元，升7.2%。
由於是浪調整未有破壞自○八年底以來嘅上升軌道，相信短期股價整固過後可再展升勢，下一目標睇50日線38元，止蝕位30元。若然對正股表現有信心，又可以承擔較高風險，不妨留意建滔認股證（00971），此證二○一二年十月到期，1換1，行使價40元，溢價26%，實際槓桿4.27倍，只係此證成交唔多，只合小注刀仔鋸大樹。
戰報
僑雄能源（00381）
冼金基昨日推介僑雄，表現對辦，即日低位0.415元，最高掃上0.455元，單日升幅已有9.6%。
華潤燃氣（01193）
阿莊本月八日推介的華潤燃氣，股價穩步上揚，昨日高見10.44元，較推介當日低位9.38元，累升11.3%。