縱使歐洲情況未盡好轉，單憑上海A股初步在2,500至2,600點見支持，史提芬認為已足夠支持港股重返20,000點關口樓上，可是幻想美麗，現實殘酷，按預託證券收市價估計，今日試19,400至19,500點的機會唔細，外圍風雨飄搖，短炒揸重貨過夜風險同回報唔成正比。

何文田豪宅地皮拍賣，成為本周港股焦點，南昌站上蓋地皮最近流標收場，但市場估計周二賣地拍板價，依然會去到70億至90億元的天價，相當於每呎8,000至逾10,000元，只怕五月美國就業數據估高開低，今次拍賣如果又係咁，地產股股價短期會有麻煩。

升市尾聲買落後股，但個市跌到五窮六絕，又輪到增長股有值博條件。有一段時間無提過嘅愛股瑞聲聲學（02018），在四、五月跌市期間，因基金狂掟一些去年升幅十分勁的二三線套利，令○九年累積升幅達270％的瑞聲，成為先沽而後快的套現對象，股價由高位15.29元跌到最低9.05元，最近股價有喘定迹象，以上周五收市價11.54元計算，已經收復約四成跌幅。而高盛上周五一份報告亦認為瑞聲估值吸引，建議買入，睇14.3元。

電子消費品市場復甦

瑞聲主攻微型揚聲器生意，生產的喇叭體積極微細，適用於手提電話及部分電子消費品中，客戶全部鼎鼎大名，包括諾基亞、新力愛立信及摩托羅拉等，今日電子消費品體積愈來愈細小（部分手機揚聲器直徑僅得兩三毫米），形成聲樂產品市場演變成科研投入競賽，行業入門屏障愈來愈高。

諗落今時今日的瑞聲，與十年前的德昌（00179）比較，兩者相似的地方的確唔少，同樣是業務性質簡單，處身寡頭壟斷市場，為大型企業生產零部件，而所受市場競爭的程度，亦遠不及產業周期盛衰的影響來得大。

本來單靠高階智能手機每年低雙位數的增長，大家可能興趣不大，但近年體積更薄的LED電視普及，微型揚聲器需求大增，瑞聲與電子消費品生產商長期的良好關係，成為開拓這全新市場的一大優勢。上星期，瑞聲夥拍私募股權公司收購Perkin Elmer閃光燈業務，進軍數碼相機閃燈市場，如果同筆者一樣相信，未來兩年電子消費品市場將進入金融海嘯後的復甦周期，瑞聲目前估值吸引力都幾大，即使只係德昌黃金期四十倍PE打個五折，經已夠支持股價翻一番。