本文重點
道指上周五急挫逾300點收市，真係睇到心慌慌！事實上，歐、美經濟積弱已有一段時間，一個「老人家」同一個「中年人」，冇事好哋哋，一有起病就愈揭愈多，可見淡友要搵沽售藉口衝擊股市係何等容易！環球股市易跌難升，本周恒指將現「死亡交叉」，這個「六絕」之月可能過得相當漫長！
本周五世界盃開鑼，期間股市例淡嘅宿命論似乎又會再一次應驗。上文提及嘅「死亡交叉」，乃指恒指50日線（20,719點）即將跌穿250日線（20,717點），圖表派視此為重大利淡訊號，再睇埋個別股份，兩地房產股受制於政策因素，出口股弱勢未改，內銀股集資陰霾籠罩。相比之下，內地電訊股、內需股會係較穩陣嘅板塊，但單靠呢兩瓣實在難撐起大市，所以目前尚未到估底嘅時候。
講開內需股，上周商務部宣布將家電以舊換新政策實施範圍由九個試點增至覆蓋共二十八個省市，直至明年底止。家電業扶助力度明顯加大，市場估計下一個加大扶持力度嘅行業係汽車業，家電及汽車股跌到咁上下，又可以留意翻兜炒波幅嘅機會。
行業安度最壞時刻
全球經濟復甦進度未明，原油需求可能未及預期，油價只會維持上落市，對航空企業並非壞事。今年首四個月，內地民航業實現盈利93.9億元人民幣，其中運輸總周轉量同比增長三成，反映行業已安度最壞時刻。雖然上月歐洲部分國家航空運輸受火山灰影響，但對內地航空股影響不大。
在內地航空股中，國航（00753）一向以經營表現取勝，其設有嘅油料對沖機制亦行之有效。上月下旬，國泰航空（00293）喺場內按平均每股7.087元，增持國航1,800萬股H股，涉資1.28億元，持股量增至51.4%。主要股東入場支持可視為利好因素，股價走勢亦強於大市，短線市況波動，或可帶來進場機會。