不過，志強呢幾日手風唔多順，要減減舊貨重新再部署。中國木業（00269）以均價0.141元沽出300萬股，集中火力再加注杏林醫療（08130），早段見股價曾跌穿0.1元，但明顯係震倉，以每股0.099元再買入200萬股，一於同佢搏命。

大市回氣，股仔又落鑊，志強都係炒開細價股，見新時代能源（00166）靜極思動，成交顯著回升，可能隨時開車。

新時代較早前宣布以6億元收購昌運控股，此公司間接持有宏文黃金90%權益，其業務範圍包括開採、精煉及銷售黃金，擁有三個位於河北省青龍滿族自治縣之金礦，估計含金礦石資源約390萬噸（金質金屬數量約2.1萬千克）。

如完成收購兩年內，該等金礦的黃金資源達至或超過JORC（澳洲準則）之推定資源水平逾50噸，新時代則須發行額外新股約2.94億股予賣方，每股作價0.34元，相當於1億元；而賣方同意不會於獲配新股後三個月內出售。

金價上升推動股價

昨日新時代收市報0.345元，跟新股作價相若。雖然所收購的金礦未能即時為集團帶來盈利貢獻，但最近金價上升，料可成為推動股價的催化劑。