現時恒指一○年預期市盈率是13.4倍左右，低過歷史平均值的十五倍，市帳率1.96倍水平，亦貼近平均的兩倍水平，故20,000點、21,000點的港股屬合理，除非外圍氣氛變得十分差，否則今年上半年調整要見18,000點並唔容易。

港交所後市未樂觀

有牌賭場港交所（00388），○九年業績賺47.04億元，倒退8%。若然係唔不太貼市的股民，對此或會覺得意外，事關○九年港股大牛市，但日均交投反而及唔上○八年金融海嘯的單邊跌市，跌14%，只得623億元，結果收入同大市成交掛鈎的港交所，賺錢能力也受拖累。

以1,400億元市值計，港交所歷史市盈率是29.8倍，唔算便宜，尤其大市雖然由去年谷底反彈，但成交卻係未見起色，大行估今年賺60億元，似乎仲係樂觀咗少少，以600億元的日均成交計，相信港交所股價回到110至120元區域，機會要比重返150元大。

近年二三線股轉型屢見不鮮，但數到近年最令人「O嘴」嘅「多元化發展」計劃，比亞迪（01211）做開電池走去做車，都算經典，但都比唔上中移（00941）以做手機理財服務為理由，入股上海浦發銀行咁神怪，股價過去兩個交易日內由77.8元跌到尋日收市的72.85元，市值唔見咗993億元，足足乎係傳聞入股作價400億元（人民幣．下同）的兩倍有多。

錢太多是中移長久問題，睇番短短四年之間，這中國移動通訊界的一哥，手頭現金由1,040億元翻兩番，去到○八年的2,560億，每年營運現金流入1,970億，明知無成本效益仍要開發全新制式TD-SCDMA，亦只係一年花費1,220億，錢太多又唔派走，結果借花敬佛幫吓浦發銀行。憧憬調升派息的中移股東，結果又一次失望。

市場反應略嫌過敏

中資行確係「未卜先知」，中金周初出報告估入股浦發非空穴來風，計算減去利息成本後商業回報大約22億，等於中移淨利潤2%左右，會計數字上的即時幫助有限。但從市值蒸發幅度來看，市場對消息的反應亦有過敏之嫌。