中移（00941）證實洽商入股上海浦發銀行，目的係藉此進軍移動電子商務市場。睇嚟，喺三大流動電訊商競爭日趨激烈之下，大家都在尋求創新業務模式。不過，投行對此睇法各異，更有指中移此舉實為「不務正業」。中移昨日跌2.4%，報72.85元。

阿莊仲記得，當年專營電池業務嘅比亞迪（01211）涉足汽車業務，而公路股浙江滬杭甬（00576）亦因收不回投資本金，被迫買下浙商證券，涉足券商業務，當時兩者同惹來「不務正業」嘅批評。惟事後經公司努力經營，結果證明新投資可為股東帶來理想回報，所以話唔使過早對中移呢項潛在投資成效下定論，反而年內宜關注中移入股台灣遠傳電信，以及回歸A股市場嘅進度，喺股價現突破前，可繼續喺70至80元水平炒上落。

新業務潛力未反映

講開大價股，又睇番隻恒安國際（01044）。去年上半年毛利率同比增長5.8個百分點，至45%，純利增長54%至9.66億元。由於去年下半年內地消費市道大好，加上原材料價格回升有序，料全年度業績可再創新高，淨利潤有望挑戰20億元大關。

除了核心嘅衞生巾、紙尿褲及紙巾業務外，恒安前年底開始涉足零食業務，去年中期該業務帶來4.8億元收益及6,741萬元經營溢利，已成為盈利新增長點，惟以目前公司嘅估值，尚未反映這方面嘅潛力。

昨日恒安股價重上50日線53.5元，收報54.45元，成交明顯增加，走勢呈小圓底回升，若反彈浪成氣候，季結前料可再次挑戰60元阻力位，支持位喺50元。

順帶一提，昨日阿莊坐言起行，以平均價3.85元買入中航科工（02357）20萬股，中期目標睇5元。