本文重點
港交所（00388）尋日公布成績表，前行政總裁周文耀退休前特別獲發嘅一份花紅金額亦曝光。周文耀○九年度嘅花紅達780萬元，相等於佢一年嘅年薪，令到佢○九年度薪酬總計高達1,709萬元，較○八年度薪酬總計1,382萬元（其中花紅390萬元），高出23.6%。周文耀今次退休，可謂滿載而歸。
報告亦顯示，周文耀今年一月一日至十五日嘅薪酬總共有489萬元，包括薪金、假期薪酬、保險費、會籍及退休福利支出等。
至於現任行政總裁李小加，○九年十月開始加入港交所，○九年度薪酬就有259.3萬元，並沒有表現花紅。報告暫時亦見唔到佢有任何認股權。
全體員工平均加薪3%
最估唔到係連主席夏佳理，同一班非執行董事都有人工加。今年二月港交所薪酬委員會建議，主席今年度人工由45萬增至50萬元，即加薪11%；而非執董亦由30萬增加至35萬元，即加薪16.6%。由於經濟環境好轉，港交所員工今年平均加薪3%。