本文重點
銀行家一向以人工高、福利好見稱，但內地銀行家都係「公務員」，無歐美銀行家薪酬咁惹民憤之餘，仲連假都唔得閒放。建行公關及企業文化部總經理胡昌苗同太子講，佢已經幾年無放過年假，不過佢哋係無得儲起假期，亦無得「補水」，以胡總一年十幾日年假計，幾十日假期就咁無咗，如果係一般打工仔一定心痛死，不過胡總只係輕輕講咗句，有公事在身無得計，真係模範員工。
幾年無得放大假
好在內地銀行一般假期都唔少，胡總春節都放咗一個星期假。佢話趁放假去咗哈爾濱旅行，天氣好凍，最高嘅時候都係得零下8度，不過室內就好暖；反而佢話香港好有趣，因為香港無暖氣，隨時室內凍過室外。
胡總仲同太子講，其實建行有一半分行喺農曆新年都會繼續營業，因為啲人
完利是，要將啲利是錢存入銀行，睇嚟建行吸存款真係非常進取，但係亦唔會苛待員工，因為農曆新年時，同事都會用輪更制，亦會發放比平時更高嘅人工同加班費，算係非常體貼。