虎年投資首選揀航天控股（00031）。因為集團具有兩大概念，一為配合國策全力發展旗下海南省航天發射場項目，二則是策劃中嘅宇航小衞星產業，以上每個概念都足以令航控脫胎換骨，成為今年「升」市之星。

航天海南主題公園項目，佔地400萬平方米，將分別興建火箭發射場同主題公園區，主題公園包括休閒區、中心湖區，以及建立以地球、太陽、月球同火星命名嘅航天主題公園區，預期每年可接待500萬人，而管理層亦曾揚言主題公園吸引力將更勝迪士尼樂園，成為國際旅遊熱點。

至於策劃中嘅小衞星現代城市管理更係一全新概念，航控正同母公司組成小衞星公司全力向內地各大城市推廣小衞星建設，預期將吸引內地城市投資，並計劃進一步開拓海外市場，以凸顯航控嘅概念，同增強投資價值。

航控早前以每股1.13元，向市場配售5.14億股集資約5.6億元，手頭現金增至逾18億元，已足夠發展之用。配股後，股價於1.2元水平整固，一旦消化完成，突破1.22元阻力，初步上升目標1.6元。