牛年恒指由低位回升五成，踏入虎年，股市將有較大波動，係考「智慧」嘅一年。阿莊相信內地經濟發展持續向好，只要大家順國策而為，便可喺中資股中發掘致富寶藏！

講到國策，去年中央政府推出「汽車下鄉」及「以舊換新」等計劃，令汽車業出現前所未有嘅榮境。踏入今年，汽車業仍然係中央重點扶持嘅產業，但有別於去年側重以財政補貼方式催谷汽車消費，今年當局還會致力於推動汽車產業嘅整合，透過汰弱留強，改善技術及營運效益，全面提升中國汽車業喺國際市場嘅競爭能力。故阿莊相信，今年汽車業將會有大型重組兼併活動，基金將繼續主戰汽車股。

駿威（00203）母公司廣汽已宣布申請以H股介紹形式在港掛牌，其中包括以協議安排方式以新上市股份為對價全面收購駿威。

廣汽變相借殼上市

講起廣汽呢個大計，其實真係設計得好「妙」，事關呢個方案巧妙地將駿威嘅紅籌身份變成H股，為未來回歸A股市場而鋪路，若計劃順利進行，廣汽變相借駿威上市地位，便捷地實現了整體上市，免卻了進行IPO上市嘅繁瑣程序。站喺駿威股東嘅角度，只要換股價合理，改為揸母公司股份亦唔係壞事，事關母公司整體上市係必然方向，咁樣反而解決了二者上市後嘅競爭問題。

為咗實現呢個天衣無縫嘅計劃，相信廣汽對駿威股東出手唔會太低，預期廣汽上H股後又好快發A股，且喺融資能力大增之下，將加快購併步伐，好消息如雨後春筍，股價有排炒。就從呢個角度，投機者可以考慮跟進駿威，目標坐5望6。