本文重點
揸咗重貨過周末嘅股民，可能被上周美股嘅跌勢嚇親，尋日所見，吹水專家紛紛預期見20,000點甚至19,800點，結果港股又一次同股民開玩笑，恒指跌幅相當溫和，跌127點，收報20,598點。跌得少，要多得美國總統奧巴馬周日公開支持伯南克連任聯儲局主席，共和黨資深參議員Mitch McConnell亦為伯南克站台，認為伯蛇可獲跨黨派支持順利連任，撫平市場不安情緒。另外，高盛唱好地產股，認為樓價企穩九七風暴後高位，但地產股普遍比高峰跌咗一至兩成五並唔合理，地產股走強，也令港股收市跌幅大大低於預期。基於短期港股已十分超賣，唔排除先來一個技術反彈，恒指有機會重返21,000點頸線，甚至10日平均線21,405點。
自從iPhone等功能強勁的手提電話日益普及，今時今日，拎部電話出街，幾乎同帶住一部手提電腦無乜分別。筆者親身體驗，依家搭車搭船，旁邊總有人在上網、睇片或者同朋友chatting，身邊朋友唔單止對電訊網絡供應、通話語音質素高低見解深入，就連數據傳輸速度，個個都變晒專家。
大熱賣的蘋果公司iPhone，最近同數碼通（00315）達成供貨協議，開始以多一個渠道榨乾消費者個荷包，已經用緊iPhone的史提芬，還是比較對投資機會感興趣。自從十一月底數碼通表示即將推出iPhone之後，股價升勢不斷，由4.9元到尋日7.16元，累積升幅四成六，圖表睇直頭係30度角完美上升斜線。
智能電話帶動消費
筆者所見，過往只付一百幾十「打電話」的，的確唔少人突然每個月肯畀三五百蚊任用「無限數據」，智能電話確實有助提升消費。論往績，數碼通過去幾年業績並唔穩定，競爭激烈加上手機補貼多多，五年來盈利介乎4,246萬到3.26億元，平均大約1.74億元，以市值38億元減去手上約6.7億現金計，大約等於十八倍市盈率，以股論股，唔算十分便宜。但值得留意，早前數碼通向港府投得新頻寬，已具備條件發展俗稱的4G網絡，傳送速度提升至100M，簡單講，就係喺流動網絡、家居電話及寬頻服務的舊有基礎上，有足夠閒置頻寬，發展其他更高規格服務，例如電視內容廣播，會唔會係第二間城電（01137），不妨拭目以待。