喺加息陰霾下，內銀股反彈乏力，投資者必須明白，今年內地難以像去年般「放水」，否則反而會形成新嘅危機，銀根收緊已成趨勢。上周五，中國銀行（03988）宣布透過發行可換股債券及尋求股東授權配發A、H股集資，投資者相信，其他內銀股集資活動陸續有來，致使內銀股股價表現受到制約。據聞為了避免同時進行大型「抽水」活動，農行最快要第二季才會實現在港上市。

放大圖片	放大圖片	放大圖片

平心而論，若然中國經濟持續較快增長，沒有道理要睇淡內銀股，故若閣下屬長線投資者，可繼續持貨。不過，若然閣下尚未入市，則建議暫毋須心急，相信年中前會有更好嘅入市機會。

講到「加息」，有別於內銀股受負面影響，保險股應該係受惠者。喺保險股之中，較少人提及中國太平（00966）。近年中國太平嘅新業務及內涵價值增長明顯，已吸引不少機構投資者嘅注視。去年旗下太平人壽保險累積保費收入達225億元人民幣，同比增長19.4%，亦優於市場預期。

業務重組成效漸顯

去年中國太平一大動作，乃完成收購民安控股，展望今年嘅工作重點，自然係整合二者資源。另一點須注意，乃自去年起，公司須按新準則編製財務報表，幸而新準則與公司近幾年嘅做法接近，相信所受影響會較同業小。

阿莊相信，近年管理層積極構建再保、壽險、產險及養老金四大業務，成效將逐步反映喺業績上，適逢今年又係中國太平在A股上市十周年，股價表現值得期待，說不定首季正係全年股價低位所在，且看能否喺20元邊執到平貨！