紀勤呢次坐鎮香江，令到佢哋總行嘅同事打醒十二分精神，第一件事就執到自己嘅工作範圍乾乾淨淨。咁就係啦，萬一紀勤巡到嚟，都要似模似樣，唔可以畀集團CEO一個壞印象。

葛霖傳年半內退休

紀勤走咗之後，倫敦嗰邊就剩低主席葛霖獨撐。講開又講，葛霖上場做大笨象主席後，都好似無乜好日子過，櫈都未坐暖就出現次按問題，跟隨再嚟個金融海嘯。依家個市叫做稍為好番啲，市場就傳佢好快走人。早前先至傳佢會做英倫銀行行長，日前又傳佢會喺十八個月內退休。傳聞有機會接佢嗰位嘅人並唔係紀勤，而係高盛前高層約翰桑頓。