09/01/2010

播放本新聞相關短片
查詢股票編號

Fundman睇市:寶勝燒冷灶宜分段吸

可能高鐵審批搶晒鏡,昨日港股相當納悶,恒指得27點進帳,假期前短炒活動收斂,大市交投縮番去719億元。一○年首個星期,港股累積進帳424點,但衝破22,600點阻力之後,後市走勢先會更加明朗。

超人舊年不停增持長和系股票,踏入一○年,長和系亦最早有大動作,和黃(00013)以三成三溢價私有化和電國際(02332),後者復牌急升兩成幾。舊年和電分拆港澳區業務上市,加埋將以色列業務套現,手上剩餘業務集中於未踏入收成、規模相對較細的東南亞市場,趁低私有化合情合理,對揸貨五年的小股東,亦唔係壞事,過去收番兩次大息接近每股13.75元,回報都幾和味。

值得深究反而係,連番被增持的長和系是否醞釀重組!始終和黃去年係大大大落後,斷估唔少投行都會出謀獻計,想辦法將隱藏價值反映在股價上面,要搵今年隨時發圍的大藍籌,正副選擇毫無疑問係中移(00941)同埋和黃(00013)。

恒地(00012)夥拍新世界發展(00017)在大棠道的地皮,接受政府再開出的補地價條件,唔多唔少見到地產商在拍賣會上執唔到平貨,積極由其他途徑尋求增強土儲增加發展樓面的取態。消息加埋中原地產指數升到海嘯後新高,地產股走勢唔錯。

查實自聯儲局表明傾向讓低息期延長,數據顯示去年十二月下旬本地樓市交投有升溫迹象,地產代理美聯(01200)股價早於十一月見底,由5.25元升到昨日的7.36元,累積升幅四成,跑贏地產股及大市一大截。○九年香港物業成交宗數創十二年新高,業績好係預期中事,但由彭博資訊綜合大行預測,分析員對一○年同樣樂觀,估美聯賺4.31億元,只係比○九年賺少一千萬,預期市盈率十二倍左右,都仲幾吸引,短期應該仲有水位。

大行唱好引發追捧

熱錢四圍搵機會,終於輪到運動鞋連鎖店寶勝國際(03813),其股價昨日急升一成七,收報1.39元,更精彩係成交1.54億股,係○八年中上市以來最高,可見游資之充裕,市場只係欠缺投資idea。寶勝急升源於美林出報告唱好,認為內地運動用品庫存開始回升,有利寶勝毛利改善,預期寶勝同店銷售增長今年將谷底回升,美林估計集團一○年賺5,700萬美元,比去年的1,700萬美元大幅反彈,亦接近○八年6,100萬美元的最高紀錄。

寶勝市值59.6億港元,以美林預測計市盈率13.5倍,在擁有自身品牌(去年已完成東之杰的收購)的內地零售股中都算便宜,反而火燒冷灶後反覆在所難免,最理想仲係用分注形式吸納,筆者直覺周五經歷鼎盛場面之後,要回到1.3元樓下唔容易,周一重開不妨留意。

史提芬