由於今晚大把節目，又要食大餐，又要倒數迎元旦，所以決定鳴金收兵，尋日未有買貨過夜。至於今日會唔會買貨「責年」，要睇心水股走勢如何。

今日心水係中國森林（00930），事關呢幾日半新股最受市場追捧，中國森林上市不足一個月，兼且上市以來無炒過，值得關注。集團係中國三大私營自然再生林及人工森林營運商之一，業務集中上游林業，種植樹木供應木材，主要客戶為內地木材加工廠，木材加工後可用於製造家具、建築等。

中國森林旗下林地逾九成可即時採伐，今年採伐量料達69萬立方米，明年採伐目標已完成規劃，預期將多於今年水平。內地在十月底推出《林業產業振興規劃》政策框架，已列明育林費用將比現時調低50%，有助降低公司整體伐木成本和提升毛利率。按招股書預測，截至○九年底止，年度盈利不少於5.08億元人民幣，即每股盈利0.17元人民幣，以現價計算，預測市盈率12.7倍，以其規模計，中國森林屬於本港上市林業股龍頭，現價可以話超值。

睇番走勢，近日股價先至浮番上水面，但其他新股就閒閒炒高五六成，以呢個幅度計，中國森林可炒上3.1元，屆時市盈率都不過十八倍左右。