本文重點
「家有一老，如有一寶。」新地（00016）副主席郭炳江深明呢個道理，所以佢對在新地工作了超過三十年嘅「老臣子」，都奉為「新鴻基之寶」。今晚除夕夜，佢仲慰勞呢班勞苦功高嘅老員工，邀請佢哋出席觀賞今晚於國金中心舉行嘅「除夕倒數詠香江」煙花匯演。
遊船河兼賞煙花
老友同太子講，今年新地以150萬元贊助旅發局舉辦「除夕倒數詠香江」煙花匯演，所以大會預留咗50個嘉賓位畀新地，老闆郭炳江想起呢班見證新地成長嘅「老臣子」。現時新地有逾40個員工都在公司工作逾三十年，可報名與家人參與今次活動；佢哋仲會邀請部分已榮休嘅新地員工出席。
太子聽聞班「老臣子」睇煙花匯演之前，仲有個船河酒會，總之齊齊吃喝玩樂，迎接二○一○年嘅來臨。
每年新地嘅周年聚餐晚會，都會向員工頒發長期服務獎。老友笑言，今年初嘅周年晚會中，副主席郭炳聯剛好做滿三十年，仲獲兄長郭炳江頒獎畀佢。
新地於聖誕節前已經出了雙糧，至於花紅有幾多就要農曆新年前先知道。