半新股繼續炒高，中國玉米油（01006）升勢停不了，昨日一度高見6.15元，收市報6.13元，升13.94%，較招股價高70%，單日成交4.25億元，咁嘅升勢，難道賣玉米油可以媲美賣石油？
正正由於市況缺乏焦點，炒家一見異動股便一哄而上，好似昨日太陽能股人氣旺盛，保利協鑫（03800）升6.2%，收報2.4元，成交3.98億元；鉑陽太陽能（00566）升5.7%，報1.29元，成交1.36億元。話明係即興之作，冇得預測，只有睇實升幅榜即場搞作而已。
大昌行（01828）最近宣布斥資1.44億元，收購深業實業50%權益。深業透過旗下八間附屬經營八家4S代理商，專門為一汽豐田、廣汽豐田、廣汽本田、東風本田及一汽吉林品牌嘅製造商或供應商，提供汽車銷售、零部件、售後服務及進行訊息反饋。
以深業去年純利780萬元計，驟眼睇今次收購作價算不上便宜。不過，此舉與公司拓展內地4S代理商業務策略一致，可藉此提高喺華南主要城市嘅佔有率，日後雙方喺管理平台及配件採購方面產生協同效益，故整體而言，收購消息應屬正面。
受惠個人遊放寬
本月中開始，非深圳戶口香港個人遊接受辦理，為旅遊旺季增加客源。酒店業界消息指，過去一個月本地酒店入住率理想，嚟緊春節旺季表現亦值得期待。酒店股遠東發展（00035）主營三、四星級酒店，論客源對象，應該可較大程度受惠於相關措施。
截至今年九月底止中期，遠展完成收購停車場業務，效益將於下半年度反映，另成功投得新加坡土地，而重估盈餘30億元尚未反映喺財務報表。截至九月底，公司每股資產淨值3.15元，資產負債比率由今年三月嘅100%降至82%，未來尚有改善空間。
本季以來，遠展股價反覆向上，昨日更創五十二周即市新高2.7元，只係成交額僅655萬元，略嫌不足。若明年酒店業持續復甦，應有條件進一步收窄估值折讓。