本文重點
今年最後兩隻新股尋日掛牌，專門售賣木製梳子嘅譚木匠（00837），公司主席譚傳華做木匠出身，公司當然送自己最出名嘅產品「木製梳」畀港交所作為紀念品，呢把「巨型梳」認真唔簡單，除咗有成尺咁長之外，梳子仲雕上不少生動活潑嘅松鼠同葡萄添，仲改埋個名叫「碩果纍纍」，真係別出心裁。
譚傳華喺上市儀式時話：「我們要做全球的一把梳。」即係成為全球木製梳理品及小木製品嘅第一品牌；而佢最大嘅心願要「譚木匠」品牌成為百年品牌。譚傳華同太子講，公司建立「誠實、勞動及快樂」嘅價值觀，而且佢希望將中國傳統工藝品文化宣揚出去，所以公司產品係集當代設計及傳統工藝特色於一身。
星亮玻璃虎拜早年
同樣係尋日上市嘅星亮（00955），佢哋係首家德國來港上市嘅公司，咪以為外國人唔識中國傳統，星亮送咗一個玻璃老虎擺設畀港交所，除咗寓意「虎虎生威」之外，因為明年係虎年，所以送老虎擺設，睇來外國人對十二生肖都好有研究。