大市反彈乏力，成交縮水至459.6億元，志強預咗愈玩愈縮，前日清倉離場。咁啱一沽清中信資源（01205），尋日竟拉閘停牌，唔通之前志強收風有注資嚟料？但係時也命也，既然沽早一步，賣仔莫摸頭，都係咪睇番轉頭。中信資源有乜新動向，暫時係未知數，至於較早前宣布轉型的天然乳品（00462），昨日股價急升17.5%，高收1.81元。
天然乳品自宣布以5億紐元收購新西蘭產銷牲畜及乳製品業務的UBNZ Assets Holdings，雖然其股價復牌後，一度被質疑收購「水分」成分多，收購價似乎亦好貴，但股價已累升逾倍。
呢間公司一直玩變身，早於○七年底，已由經營光碟製造、智能交通管理系統及廣播、音響系統的福茂控股，以1.3億元購入青島永鑫匯全部權益，轉型從事壓碎及揀選磁鐵礦石，並易名為中國金匯礦業，惟轉型後業績未見改善，今年五月公司再變身一條龍式企業，由經營、生產、銷售到分銷乳脂固體及乳製品等，將錄得純利逾億元。天然乳品變身做配套完備的消費股，股價剛起步，但要留意公司個別交易帳目仍有欠妥善披露，買此股有一定風險，投資者應量力而為。