展望後市，人人都知十一月份的低位21,002點相當之關鍵，事關港股由十月中開始形成的頭肩頂形態，此乃頸線所在，一旦確認失守（至少三日收低於此），用間尺一畫，恒指調整最低目標可以見18,905點。

明年股市先低後高

筆者對一○年股市有信心，但睇怕出現先低後高走勢的機會頗大，至少在美國首季陸續退出提供緊急流動性的措施，環球股市的承接力有幾大，應該見到真章，如看官們聽史提芬建議在早前減晒磅，第一季的低位一出現，會是瞓身入市的最後機會，如果真係買到19,000點樓下，都咪話唔吸引。

以前成日有人話「聖誕鐘炒滙豐」，唔知係咪以前滙控（00005）股價在年底前走勢特別好，造就呢句咁激勵人心嘅口號，可是近年，似乎已經無呢支歌唱。市悶無聊，筆者睇番過去十年滙控在十二月份股價，意外發現跌嘅佔半數，○一、○二、○六至○八年全部都跌，只有九九年、○○年及○三年做好，○四年及○五年則無升跌，大抵上，除咗去年金融海嘯，滙控股價插水近一成二之外，過往十年十二月份滙控股價上落唔算大，也證明股友成日口噏噏，唔可以當秘笈。

平心而論，即使看官無趁住「青姐」淚灑直播室當日，喺三字頭加碼滙控，但有參與28元十二供五的，都應該已經心滿意足，唔計股息今年都有六成四回報，跑贏大市。

八字頭可放膽加注

滙控目前市值1.52萬億港元或者1,960億美元，在歐、美及亞洲的三頭馬車中，失去美國市場推動後，滙控的確需要時間才可以超越○七年勁賺191億美元的驕人成就，但以滙控往績及作為一個出色的跨國性品牌，相信內地會是另一個重要業務收入來源，可能節日氣氛的影響關係，令到股市對滙控最快明年三月回內地掛牌，集資最高625億的消息反應冷淡，教筆者頗感驚訝，但可以肯定這會是滙控繼收購英國米特蘭，以及在美國HI遭到滑鐵盧之後，對長遠發展最影響深遠的消息，如果未來一季有機會見八字頭左右，筆者必定瞓身加注。