內房股表面回穩，昨日更傳來廣州亞運城地塊拍賣成交價高達255億元人民幣，據講得主係由三家民企──富力地產（02777）、碧桂園（02007）及雅居樂（03383）合組嘅財團，呢頭話要調控樓市，嗰頭又多一幅「地王」！阿莊投資中資股多年，明白投資逆國策而行嘅危險性，若市場行為繼續反政策而行，令人擔心調控政策將陸續有來。既然睇唔通，幾優質嘅內房股都好，阿莊亦不為所動，堅持暫避呢類股為妙。
市場消息稱，光明乳業最近調高部分產品售價，平均漲幅為1.8至3%，為乳品提價揭開序幕。相比起今年初，原奶及其他生產成本都有增無減，乳品商確具提價空間。如今有大品牌率先動手，相信其他生產商亦會倣效。阿莊持有嘅蒙牛乳業（02319）跌至26元水平現承接，若未持貨者，可睇位上車。
未知是否市場缺乏炒作焦點，昨見家電股有買盤追捧。明年家電業繼續獲政府補貼支持，喺炒家眼中，要博反彈，也許家電股係較穩陣嘅股類。
鋼鐵股最宜博反彈
另一個可以留意博反彈嘅板塊係鋼鐵股，事緣高盛證券最近表示，由於內地鋼鐵供應較預期少，加上鋼鐵股較高位回落已有一定程度，預期鋼鐵股現水平具上升空間，首選係鞍鋼（00347）。
阿莊屬意選首長國際（00697）。首國主營製銷鋼材產品，另兼營航運、鋼材貿易以及礦物開採業務。公司中期業績明言，今年第二季度鋼板銷量及售價明顯回升，相信趨勢可持續至明年。隨着基本因素改善，可為股價帶來支持。
工信部最近表示，明年將配合有關部門進一步規範鐵石進口秩序，同時還要將包括鋼鐵業明年度淘汰目標落實到全國各地，進一步提高鋼鐵業喺能耗、環保、資源綜合利用等方面嘅准入門檻。如是者，鋼鐵市場將更加「歸邊」，大型鋼廠嘅競爭優勢將更加凸顯，有首鋼作為股東背景嘅首國，應該係行業淘汰賽嘅贏家之列。再看走勢，近兩周股價調整成交明顯縮減，沽壓並非想像般大，且於1.7元現承接，短線目標2元，穿1.7元止蝕。