本文重點
聖誕節快到，唔少財經界猛人已經準備放假。好似立法會議員詹培忠，原來上個禮拜四已經飛咗去拉斯維加斯，聽聞金利豐老闆娘朱李月華今日亦會同一班親朋戚友到賭城玩。老詹今次與太太及一班親戚嚟到賭城，諗住逗留兩個多禮拜至明年一月三日至才返港。
住萬呎貴賓房
今次佢會分別住三間唔同嘅酒店，其中有間酒店房面積大到逾1萬呎。佢話想租都冇得租，因為要係賭場賓客至有得住。
身為賭場VIP，咁賭場會唔會包架私人飛機嚟香港接佢過去賭城呀？佢話，一般來說，如果747機可以由香港直飛賭城，但如果係737機，就要喺東京停一停加油。因為唔想停東京，於是自己坐飛機去三藩市，再由賭場派專機嚟接佢去賭城。
佢逗留喺賭城已近一個禮拜，佢話到依家已經贏咗過百萬美金，但由於仲有成十日住喺賭城，未知最後埋單如何。今次老詹喺賭城真係不愁寂寞，因為張華峰咁啱又喺度玩，但今日就會返香港。