本文重點
港股失守22,000點，恒指收報21,741點。不過，奇怪嘅係，昨日現貨收市後，期指出現大高水，收報21,896點，高水154點，係咪又一次「假失守」50日線（21,945點）誘殺「淡友」，今日便有答案。技術上，若恒指再次成功考驗50日線承接，則向上突破23,000點嘅動力將增強；否則，恒指有機會回試20,800至21,000點。
正如前日阿莊所言，時近年尾，唔少基金都開始放假，預期未來數周市況會轉靜。有鑑於此，阿莊決定整理一下手上嘅股票組合，適量沽出部分持股，鎖定利潤。昨日遂以平均價5.4元沽出30萬股中國南車（01766），獲利17.7萬元；另以平均價4.6元沽出10萬股聯想（00992），獲利1.1萬元，兩者合共套現200萬元。
旺旺走勢醞釀突破
繼續睇內需股，兩隻飲料股旺旺（00151）及統一（00220）都係唔錯嘅選擇，但短線阿莊較喜歡旺旺，近月其股價走勢似在醞釀突破，若成功向上突圍，料快叩6元大關。
昨日另外一隻吸引阿莊關注嘅異動股，就係卜蜂國際（00043）。卜蜂係卜蜂集團投資中國嘅旗艦公司，以農業起家，其後業務伸延至多個工業領域。去年四月，卜蜂宣布重組，退出飼料、畜牧及食品一條龍等農業業務，保留飼料添加劑、摩托車、化油器及汽車零部件等工業業務，旗下合營易初明通，乃全球最大建築及採礦機械生產商Caterpillar卡特彼勒喺中國西部嘅獨家代理商。
上月初，卜蜂曾發出通告，指有關向控股股東收購位於內地及越南嘅飼料廠控股權，初步磋商已經終止。不過，同月下旬，卜蜂又再宣布，近期已就向控股股東收購內地（而非越南）嘅獨立飼料廠重新展開磋商，並透露收購價預期介乎市盈率八至十二倍，總代價擬以發行新股或可兌換證券方式支付。
喺重新洽購控股股東資產嘅消息帶動下，本月初卜蜂股價一度升至0.75元，之後進行整固，本周二見0.57元後回穩，走勢圖明顯出現一支小旗形。昨日股價反彈，收報0.64元，逆市升10%，成交增至1,532萬元。股價異動是否預示注資好事近，不得而知，但若反彈勢頭持續，照計今轉可突破本月初高位，小注投機性跟進，目標見0.8元，止蝕位0.58元。