本文重點
英皇鐘錶珠寶（00887）尋日搞咗個鐘錶展，一次過展出60多隻名錶，吸引名錶愛好者捧場，包括美聯集團（01200）主席黃建業夫婦及物業投資者羅家寶等。英皇鐘錶珠寶董事總經理楊諾思好開心咁話，今年佢哋搞咗三場珠寶同鐘錶展，刺激店舖生意，今年九至十一月同店銷售有30%增長。
刺激營業額增30%
今次嘅鐘錶展係同公司旗下名錶百達翡麗（Patek Philippe）合作，楊諾思揀咗呢個牌子cemma系列畀在場人士睇，隻女裝錶價值150多萬元，雖然唔係全場最貴嘅錶，但佢自己就好鍾意，仲滿場飛同嘉賓介紹名錶。
楊諾思話，今年九至十一月同店銷售好理想，有30%嘅增長，其中銅鑼灣店舖同店銷售有40%增長添！佢相信聖誕節零售市道會好過舊年，因內地人喜歡來港過聖誕節，順便購物。
楊諾思又話，今年公司開始進軍內地，明年計劃於內地二、三線城市開20間店舖，現時二、三線城市發展迅速，珠寶同鐘錶產品市場潛力很大，對明年內地高檔次市場樂觀。