本文重點
今年豹紋再度成為秋冬時裝最潮元素，無論係高貴華麗嘅服裝，還是輕便服裝，都離唔開動物圖案。證券商協會副會長蔡陳葆心，原來就係豹紋嘅忠實擁躉。太子日前經過中環，突然間眼前一亮，見到三個女士全部一身豹紋打扮，同周圍全身灰灰黑黑嘅路人甲、乙、丙相比，絕對搶晒鏡。再睇真一些，原來係蔡太同兩個契女結伴行街。
一屋豹紋梳化傢俬
蔡太唔單止係香港股壇嘅前輩，仲係走在時裝潮流前端。蔡太講，佢唔係依家先跟風鍾意豹紋，喺幾十年前就已經係豹紋嘅忠實fans，屋企包括梳化等傢俬，隨處都可以見到相關產品。至於當日見到蔡太穿着嘅豹紋大褸，更加係專程由加拿大買番嚟嘅真豹皮，唔單止貴氣逼人，寒流侵襲時着上身真係暖笠笠㗎。
豹紋圖案雖然又靚又有型，但係都勁蝦人着。蔡太就教大家，着豹紋要全身襯晒先好睇。好似佢自己，雖然因為眼部做完手術，醫生建議唔可以在頭髮上「動手腳」，不過，襯番一頂豹皮帽一樣掂。