近期留意到餐飲業股份稻香（00573），大股東及基金VP雙雙增持，股價受消息刺激連日做好，昨收報3.2元，升0.26元，較上星期四申報增持日之前股價2.7元，累積升幅達18.5%。股神巴菲特話大股東與管理層沽貨原因多不勝數，你未必要理，但佢哋出錢增持，只有一個理由，就係睇好公司發展，今次大股東與VP真金白銀分別增持1,250萬股及6,752萬股（每股2.55元），看官大可視為未來股價支持位。

估值較同業低一截

本地餐飲業難做幾乎人所共知，地產好景時，商舖業主一般唔肯同租客簽長約，一來為隨時收舖套現鋪路，而當租客生意好時，業主續約時就提出加租。近年餐飲業個體戶有愈來愈難為的趨勢，但亦因為咁，大型連鎖飲食集團，像大家樂（00341）、大快活（00052）、稻香及美心一類，勝在規模較大，同業主有較佳議價能力，滲透率反而愈來愈高。

今年六月底，稻香在本港及中國分別有60家及13家分店，目標是二○一一年，把食肆數目增至100家，令整體市佔率由目前的5%增至一成。將本地餐飲類股份比較，稻香一○年預期市盈率11.4倍，比大家樂的18.7倍折讓四成，估值算係幾吸引！另一點值得留意嘅係，○六年稻香內地收入佔總營業額仲唔夠1%，○七年升至13.2%，○八年16.2%，今年上半年更達16.6%。睇番內地收入為主的小肥羊（00968），一○年預期市盈率高達20.3倍，當稻香內地業務修成正果，估值有被重估的可能，係就係買貴大股東兩成，但現在搭順風車，應該為時未晚。