本文重點
恒指再衝23,000點關不果，低收作結，報22,840點，跌73點，大市成交增至770億元。美國總統奧巴馬完成訪華行程，相信短期大市焦點將轉移至提前喺本月底召開嘅中國經濟工作會議。聽講今次官方提前會議，係想向市場派發「定心丸」，表明適度寬鬆貨幣政策將會持續，以釋各方對「退市」嘅疑慮。
談及明年經濟展望，中國人民銀行顧問樊綱表示，中國擺脫去年末季嘅經濟滑坡後，並沒有W形衰退嘅危險，明年可實現8%增長。
航運股之中，早前阿莊亦提過隻中海集運（02866），昨日成交增至8.27億元，收報3.09元，升1.98%，屬大撼大場面，且看能否突破過去三個月嘅橫行區；至於中海發展（01138）及中外運航運（00368），股價分別升5.6%及3.3%，成交均顯著增加。
此外，從事海、陸、空貨運、倉儲碼頭服務、快遞、船務代理業務嘅中外運（00598）亦值得留意。事實上，公司業務正在復甦，有迹可尋。上月底，其持股63.46%嘅上海A股中外運空運發展公布，按中國會計準則，今年第三季純利1.04億元人民幣，同比增長達1.34倍，而首三季度純利則為1.16億元人民幣，反映第三季度反彈勢頭強勁，下半年公司轉移焦點至加快建設內貿物流及內貿運力平台嘅策略收效。
具備重組注資概念
目前，內地物流行業仍相對分散，未來中外運大可藉購併加快擴大內地物流王國嘅擴張速度。講到購併，早前中外運的母公司與中國長航合併，成為內地第二大航運物流公司，地位僅次於中國遠洋集團總公司，市場一直憧憬二者整合資產過後，可為中外運新增船舶代理、長江沿線加油站及物流服務等業務，更有機會向中外運注入物流資產。
站在業務復甦及注資憧憬的角度，中外運現價中線值博率高，適逢近日航運股氣氛漸漸升溫，呢隻股煲中嘅話，閒閒哋可博三至五成利潤。
順帶一提，阿莊持有嘅聯想（00992）派發中期息每股0.01元，於今日除淨，所持10萬股收息1,000大元，昨日收報4.53元。另外，手持嘅中國鐵鈦（00893）昨日收報4.92元，逆市升3.15%，最後召集，別錯失上車機會。