本文重點
心水清的讀者應該記得，早排太子話過復星（00656）董事長郭廣昌今年初接咗個「燙手山芋」，頂替突然退出籌建上海世博其中一個展覽館的西門子，興建民營企業聯合館，仲搵到阿里巴巴（01688）老細馬雲同另外13家民企，齊為世博出一分力。
每家公司出資2000萬
太子喺上海聽復星集團總裁助理、「民企館館長」孫軍講，呢15家公司當中有民生銀行（01988）、蘇寧電器、華誼兄弟同埋分眾傳媒等，每間企業各出資2,000萬人仔，不過華誼同分眾就特別啲，出力唔出錢。
咪以為呢兩家公司唔使出錢有着數，原來華誼搵咗旗下班明星包括周迅、李冰冰及黃曉明等，合唱民企館「館歌」兼拍MTV，明年世博仲會輪流駐場；另外又搵名導演馮小剛為民企館拍一段宣傳片，以呢班明星同大導嘅號召力，價值隨時超過2,000萬。至於做戶外媒體的分眾就會狂播民企館宣傳廣告，務求做到全上海都知道民企館的存在。