以唐宋明清做背景

邱德根話好多地方都有迪士尼樂園，作為中國人好希望呢個坐落於中國嘅主題公園富有中國色彩，佢建議上海迪士尼可以興建有歷史背景，例如以唐、宋、明、清四朝故事作襯托嘅主題公園，當然主題公園仍會包括一般遊樂設備，並且最好由中國人參與管理。

邱德根提出咁有創意嘅概念，除咗因為佢曾興建宋城等主題公園，對中國歷史文化有好深厚嘅認識及情意結外，佢話依家全球迪士尼樂園千篇一律，佢去過香港嗰個，覺得就係美國迪士尼樂園嘅縮影，佢就提出將來嘅上海迪士尼要與眾不同。

邱德根今年已年屆八十五，仍然好活躍，四周圍去，早前就去咗花樣年（01777）嘅推介會湊熱鬧，佢話希望上海迪士尼樂園建成後去參觀。