港股尋日朝高開23,000點，第一口價居然已經係全日高位，之後悶足一日，恒指最後跌29點，收報22,914點，罕有嘅破位唔升格局，可見23,500點心理壓力有幾大！魚缸之內，除咗連日插水的中策（00235）突見死貓彈之外，炒家似乎無乜焦點。身為球迷嘅筆者，近期日日留意住英超轉播權花落誰家，結果出來，兩間收費電視交換播英超及西甲，打算只幫襯一間的慳家觀眾，今次真係多得佢哋唔少。
失落三年的英超轉播權又落番响有線寬頻（01097）手上，刺激股價抽高兩成一，收報1.2元。市傳三年轉播權要價15億元，同三年前電盈（00008）旗下Now TV盛傳嘅出價一樣。有線六月底擁客94.7萬，假設有六成睇波，為睇英超每戶要夾73元，對比中期收費電視每戶每月營業額104.7元，可見加價壓力相當大，最後能否將成本轉嫁觀眾還是後話，但兩間收費電視輪流銀彈搶客，羊毛出在羊身上，睇波成本愈嚟愈高，股民同球迷每三年都要冒續唔續約嘅風險，實在唔係好事。
手機市場復甦在望
上個月，手機界巨頭諾基亞睇好手機市場，調高今、明兩年付運量預測，全球最大手機代工商富士康（02038），股價即由當時約5元水平起步，抽升至7.87元，經歷橫行之後，在6.8至7元附近見支持，有再展升浪之勢，尋日收市報7.07元，升0.25元。
富士康及母公司台灣鴻海，在全球OEM及ODM電子消費品代工行業，已達無出其右之境界，前者專攻手機及流動通訊設備，鴻海則主力在電腦及電腦周邊產品上。歐美市場佔富士康銷售額接近一半，一場海嘯影響，去年下半年富士康錄得2,108萬美元虧損，是上市後首次，延至今年上半年流血情況未改，再蝕1,870萬美元。
估值仍處合理水平
或許有人擔心富士康黃金期過去，但客觀環境，歐美消費市場開始復甦，高毛利智能手機滲透率漸高，已提供足夠賣點，而且，近年歐洲手機品牌為減低成本，改以更大比例外判，富士康最壞時刻已過，幾乎屬市場共識。
○九年上半年失地太多，以一○年預期市盈率要26.8倍，但富士康處身高增長行業，這由海嘯前的○五至○七年估值，介乎二十至六十倍的溢價可見一二。現價雖唔算便宜，但相信仍然在基金經理的可接受範圍內，加上○八年下半年預期逆轉的業績幫助，7元水平附近入市，三至六個月內，應該仲有上升空間。