本文重點
行政會議成員張建東前日宣布不再出任新地（00016）獨立非執行董事，太子第一時間問吓當事人點解有咁嘅決定？佢話真係冇咩特別原因，只係因為自己實在太忙、太多公職。原來佢○七年做咗新地獨立非執董後，多咗好多公職同董事職務。
一年去英國七次開會
好似滙控（00005）咁，佢今年二月正式出任獨立非執董，佢話自己一年要七次飛過英國開董事會。
咁又真係飛得幾密喎！根據滙控嘅公告，佢每年有6.5萬英鎊董事袍金。
除咗滙控獨立非執董外，佢加入新地後，其他新嘅公職仲包括○八年出任機管局主席（佢之前係機管局董事）、同科技大學校董會主席等。
張建東依家仲係恒生銀行（00011）、香港興業（00480）同港交所（00388）嘅獨立非執董。佢喺○三年辭去畢馬威會計行中國及香港主席一職後，過半退休嘅生活，平時鍾意打高球、旅遊同睇電影嘅佢有咁多公職，又要成日出埠，睇怕打波嘅時間都唔多了！