受惠第三季度股指上升且交投暢旺，港交所（00388）第三季純利增長33%，與市場預期相近。第四季已過一半，股市牛氣沖天，加上去年第四季金融海嘯，基數較低，料本季業績可續報佳音，故維持逢低收集港交所嘅建議。
滙豐控股（00005）第三季度業績超預期，股價急升5.98%，收報94元，如無意外好快挑戰100元大關，這亦係阿莊相信，恒指有勢叩23,000點關嘅原因之一。另一個睇好後市嘅理由係內地形勢一片大好，只要內地經濟保持增長，已成中資股天下嘅港股，將可吸引更多資金進駐。
除了大價股之外，二、三線股亦十分之旺場，唔少衰咗好多年嘅細價股，突然「平地一聲雷」，好似虧損經年嘅品質（00243），上周股價翻一番，交投明顯增加，即使本周現整固，股價仍穩守喺0.4元水平。
再看另一隻過氣科技股中芯（00981），與死對頭台積電終於冰釋前嫌，就訴訟達成和解協議，但造就咁嘅局面，有人歡喜有人愁，苦撐咗五、六年嘅執董、總裁兼首席執行官張汝京要退位讓賢，投行對此頗感意外。
平息紛爭和氣生財
老實講，以中芯有如此強大嘅中方股東長年支持，表現令人失望，唔少長年揸中芯嘅投資者，聽公司講爭取轉盈已聽到冇晒反應。跟台積電嘅訴訟已困擾公司多年，如今中芯賠錢兼發股，變相引入台積電為股東，平息紛爭兼夾換帥，未嘗唔係「破釜沉舟」之舉。
由於台積電換來中芯嘅認股權證行使價高達1.3元，市場憧憬台積電將藉中芯作為擴大喺內地投資嘅平台，再加上公司新舵手王寧國大有來頭，乃華虹集團前首席執行官及旗下華虹NEC嘅董事長，相信呢位高人將一改中芯過去多年嘅不足，充分利用中芯作為上市公司嘅融資功能，主導內地晶圓行業整合。
昨日中芯復牌，高開後現回吐，但尾市又再炒起，聽講部分屬對岸炒家，事關當地半導體業一哥台積電入股中芯，已成為業界大新聞。好一個「醜女大翻身」股場版，相信其股價及後表現值得期待。