昨日跌市，地產股首當其衝，收市後發展商與政府開會討論樓市問題。其實阿莊認為，最佳做法莫過於適量增加土地供應，若然本地失業率持續改善，經濟持續復甦，照計適量新增土地供應，不會對樓市造成太大打擊，但卻能真正令樓市炒風收斂。
明年世博喺上海舉行，上海投資概念遲早大炒一轉，所以阿莊重申，季內宜密切留意低吸上海市窗口公司──上實（00363）嘅機會。
阿莊上周買入嘅國壽（02628）公布第三季度業績，表現符合市場預期，見外資行評價正面，故雖然昨日港股及A股均低收，但國壽股價卻逆市靠穩，高位曾見38.65元，收報37.95元，升0.5%。做定兩手準備，短線若升穿昨日高位，可如期向目標40元推進，但若市況末配合，則宜睇位食胡，候調整再作吸納。
除咗國壽之外，陸續有國企公布季度業績，表現不俗。就如南車時代（03898）公布，今年首九個月營業額同比增長58%至21.13億元（人民幣．下同），純利3.6億元，增長32.8%。
截至九月底公司資產負債比率為10.8%，資產淨值36.4億元，其中現金及等值佔資產總值15%。業績穩步上揚，解釋了為何公司股價自七月份突破12元阻力位後，頭也不回，昨日收市報13.9元。
協同效益逐步浮現
今年六月及七月，先後有國家領導人視察南車時代的生產基地，包括國務院總理溫家寶。喺工信部與國家統計局早前公布嘅「中國軟件業務收入前百家企業」中，南車時代排名由上年度嘅92位躍升至37位。這些都足以顯示，公司嘅發展方向和表現得到國策嘅支持。
過去兩年，南車時代重點建設嘅半導體三線一期，於上月正式投入運作，成為內地最大嘅大尺寸功率半導體件研發及產業化基地，外界都寄望這個項目能打破外資喺內地高端半導體器件技術和市場嘅壟斷地位。此外，去年公司收購加拿大半導體公司Dynex，最近並按比例參與Dynex嘅供股計劃，相信整合過後，明年協同效益將逐步浮現。
以現價計，南車時代今年預測市盈率約二十六倍，展望來年政府會繼續投入大量資源推動軌道交通建設，配合購併效益展現，盈利前景樂觀。阿莊已手持其母公司中國南車（01766），應可分一杯羹。唔嫌價位較大，直接買入南車時代亦屬可取。