尋日恒指一度去到22,002點，最多跌315點，午市後跌幅大為收窄，只係跌107點收市報22,210點。執筆時，金管局單日入市幾次，承接近66億美元沽盤，令下星期銀行體系結餘升到2,243億，水浸情況愈來愈嚴重，三個月港元拆息去到0.188厘的海嘯後新低，熱錢充斥嘅股市，睇嚟想回頭亦唔容易。

美元隨時再跌三成

反映美元走勢的美匯指數，跌穿76終極支持，專家都估計在經濟疲弱下，美國政府短期唔單止無法退市，甚至有可能推出二輪刺激經濟措施，屆時美元匯價有機會由現水平再跌兩至三成才會見底。

美元弱勢已成，令多隻商品近期衝破重要心理關卡，金價升穿1,000美元1安士，油價升破每桶80美元大關，就連銅價，每噸亦升至6,590美元，較去年平安夜時低位2,845美元，翻了唔止一番。

要數能夠受惠銅價做好的本地上市公司，非江西銅業（00358）莫屬，剛公布三季業績，純利17.6億元（人民幣．下同），跌46%，稍勝首兩季的57%跌幅，相信與產量及產品售價回升有關。事實上，內地銅產品需求一直優於海外市場，汽車及建築業的需求持續之外，預期電網及新基建項目投資在未來兩年逐步增加比重，對內地銅業市場發展有利。

銅價高企水漲船高

江銅屬於內地礦產最多企業，一○年預期本身銅礦產量達19萬噸，相當於全國產能兩成，在銅價高企下，收入自然水漲船高。LME期銅合約價格由海嘯前高位8,730美元，最多跌近六成七，雖然江銅過去三季業績倒退，但卻一直稍勝市場預期，而且由○八年下半年虧損4.8億元的逆境中，迅速復甦過來。但因首三季失地太多，估計全年只賺25.4億元。目前大行預測是一○年銅價回到每噸6,000美元樓上，屆時江銅盈利可回升至39億元左右，等於○六、○七年的八成水平，然而近期需求回升，加上弱美元雙重推動，銅價升勢比預期更強，看來年底重返7,000美元水平機會唔細，江銅有被重估潛力，趁股價悶了近三個月，如目標睇三至六個月，筆者相信現價入市贏面頗大，暫時目標訂23至24元。