阿莊前日沽出獲利嘅富士康（02038），昨早落到6.51元拗腰回升，決定重新上車，喺6.8元追入8萬股，午後升勢令人喜出望外，收市報7.35元，睇勢今轉真係上8元！

中資電訊股數據平淡，股價冇作為係意料中事，反觀今年內地電訊設備股股價就迭創五十二周新高，龍頭中興通訊（00763）股價升至近日高位49.8元，尚未計四月公司曾十送三，還原後累升逾三倍。再看京信通信（02342）及中國無線（02369），今年股價累升各達到5.9倍及3倍。

唯一一隻仍「斯人獨憔悴」嘅係中通服（00552），現價還較去年底收市價低一成。就過去兩個月，中通服股價反覆向下，跟大升市和幾隻股價迭創高位嘅同類股，猶如處於兩個世界。有評論認為，集團太過側重內地市場，喺預期明年內地電訊設備投資高峰期過後，公司維持業績增長嘅能力將受考驗，故先後有基金股東減持至低於5%水平。

睇番中通服今年上半年業績，無論收入、毛利及純利同比增幅都超過三成，表現不俗，單是中電信（00728）、中移（00941）及聯通（00762）已佔其收入比例62%，而海外收入佔總收入比例僅為3.3%。惟以金額計，海外收入同比增長超過一倍，相信管理層亦意識到投資者嘅憂慮，問題係拓展海外業務需要時間才見成效。

股東背景佔優勢

且別忘記，三大內地電訊營運商都係中通服嘅內資股股東，即使明年整體設備支出減少，但正所謂「肥水不流別人田」，憑着呢個股東背景，中通服其實更具競爭優勢。再看現價市盈率16倍，市帳率1.8倍，相對同類股，估值之低已充分反映負面因素。時值大市處於高位，相信遲早有游資轉攻落後股，呢隻「雞肋股」，喺沽壓消化得差不多後，話唔定可以輸家食尾胡，炒番一轉，反正睇牌面現價入市風險亦唔高，值得一博。