23/10/2009

播放本新聞相關短片
查詢股票編號

郭氏兄弟齊齊減薪

新地(00016)尋日出咗○九年六月底止年度年報,太子第一時間睇吓各高層人工有冇增減,結果不出所料,副主席郭炳江同郭炳聯都減咗人工,郭炳江總薪酬由210萬元減至206萬元,郭炳聯就由227萬元減至223萬元。

郭炳湘勁減 陳鉅源逆市加

兩位郭生總薪酬減幅輕微,比香港唔少打工仔都幸運,郭炳湘相對就減得多,因為佢舊年五月由新地主席兼行政總裁調任非執董,○九年度總薪酬就由對上一年嘅284萬元,大減至13萬元。

不過,老臣子陳鉅源及鄺準就有人工加。同樣都係執行董事,陳鉅源○九年度總薪酬有成1,025萬蚊,係成個董事局入面最高薪嘅一位。鄺準總薪酬亦微升,由之前一年嘅392萬微升至396萬蚊。