阿莊多次推介嘅富士康（02038），上周終現突破，股價曾見6.18元，收市報6.09元，已經上車者，可以穩坐釣魚船。組合中嘅聯想（00992）走勢亦十分對辦，股價曾高見4.66元，本來阿莊亦想食胡，但見近期美股表現強勢，所以都係睇埋呢個星期再作決定。

放大圖片	放大圖片	放大圖片

內地九月份PMI為54.3，乃自去年五月以來近十七個月新高，亦係連續第七個月高於50水平。此外，國家能源局發布的數據顯示，九月份全國社會用電量同比增長10%至3,224億千瓦時，較八月份增幅上升2個百分點。種種迹象顯示，內地經濟持續復甦。睇勢季內內地宏觀政策不會有大改動，順風順水等到明年首季出口市場現較大起色，金融海嘯便有望正式成為過去，屆時政府有序「退市」乃順理成章之舉，對市場嘅衝擊未必會如想像般大。

個股方面，上實（00363）宣布悉數出售醫藥業務予母公司，套現57.5億元，估計交易完成後，可實現約30億元出售收益，公司表明日後會專注發展基建、房地產及消費品業務。

呢個舉動，基本上係配合母公司成立醫藥旗艦公司嘅需要，亦貫徹上實近年致力推動嘅優化產業結構策略，市場對此應該不感到意外。反而，未來焦點將落在向母公司收購房地產或基建等資產嘅進展身上。

貫徹優化產業策略

下月美國總統訪華，據聞將到訪上海市，反映上海作為全國以至國際金融中心嘅地位。上實作為上海市嘅窗口公司，顯然不能再食老本，推陳出新，優化產業，提升股東回報，係理所當然。

睇好上海市嘅長遠發展，上實係最直接嘅選擇，雖然今年以來股價已經升咗一倍有多，但有基本因素配合（包括已出售多項非核心業務，並增加土地儲備），季內股價回落至34至35元水平，可把握上車機會，明年世博前後，目標見半百大元，止蝕位訂在29元。