本文重點
新興市場早已成為全球焦點，自從「大笨象」滙豐畀美國嘅業務累到周身蟻後，就更加專注喺呢個潛力無限嘅市場，大笨象唔敢輕視印度市場，所以日前旗下嘅滙豐工商業務部，就專登為咗班印度客戶喺總行搞咗個「排燈節」酒會，同佢哋一齊歡度印度呢個咁重要嘅傳統節日。
排燈節載歌載舞
為隆重其事，執行董事王冬勝、工商業務主管陳樑才等高層都有出席是次盛會，印度客戶亦好畀面，差唔多有成300位蒞臨。
太子聽講，佢哋當晚會場係經過悉心布置，綵燈閃吓閃吓，好有印度色彩。
滙豐仲請咗唱片騎師為現場嘅賓客細意挑選曲目，亦安排咗精彩嘅舞蹈表演，睇吓相中美女嘅艷麗服裝，唔講都知係表演印度舞。相信唔單只班客，滙豐班高層都一定好盡興，既有音樂聽，又有舞蹈欣賞。場內仲有幸運朱古力占卜，為客戶占算來年運程，太子相信啲客戶對滙豐嘅安排應該都好稱心滿意。