道指期貨昨日在亞洲時段續升，主要因為美鋁公布業績優於預期，帶動亞太區股市保持升勢。港股又喺午後發動攻勢，恒指更一度突破21,500點水平，期指維持高水。志強繼續持有國美（00493）及筆克（00752），前者中線投資，後者則待短線再突破。
投資氣氛轉佳，二三線股仔好似有番啲生氣，航天控股（00031）整固咗幾日，昨日回復升勢，升近8%，高收1.09元。基金MIM自○七年五月首次披露持有逾5%航控股份，當時航控股價持續上升至1.92元。不過，在金融海嘯影響下，MIM被迫在市場減持，截至今年四月份，MIM的持股量已回落至4.6%。有消息指，在大市投資氣氛持續改善下，MIM又再出擊，在市場密密收集航控，相信與其中期業績不俗有關。而且公司仲有幾個大型項目正在進行中，MIM繼續睇好其前景，見市況好轉，再度增持亦唔出奇。
根據最新資料顯示，航控每股資產淨值91仙，以兩倍市帳率計算，股價可以高見1.82元，即係現價上車，有80%上升空間。不過志強短炒，短炒目標先睇1.3元，跌穿0.96元止蝕。