第一視頻（00082）九月初股價由1元水平急升至1.9元後回落整固，近日於1.6至1.75元之間橫行，尋日一度急升至1.76元，收1.7元，升2仙，已突破下降三角形阻力，並重上3條平均線，調整已完成，有機會再現急升，短期若能衝破1.94元之阻力，照度上去，最少可見2.35元。
經營網絡視頻業務嘅第一視頻，進軍內地手機購買福利彩票業務，係全國首家手機購彩推廣商，可以話飲咗頭啖湯，開業不足三個月，註冊用戶已急增至逾50萬人，預期今年底可達100萬人嘅目標，而一年內目標300萬人，亦應好易超標。
第一視頻獲黑龍江省福彩中心授權，成立全國首家合法營運嘅手機購彩推廣商，合作協議長達八年，以投注額計收取分成，客戶愈多注碼愈大，公司分成愈可觀。
交銀國際最新研究報告指出，第一視頻經過三年嘅耕耘後，○九年已開始進入收成期，並預期○九至一一年，每股盈利分別達0.1元、0.25元同0.35元，同時亦指出市場並未反映其未來業績大幅增長同博彩業務嘅獨特性，足以大幅提升公司嘅盈利能力，給予「買入」評級，目標價由2.2元，調升至3.8元，有逾倍嘅上升空間。