美國總統奧巴馬將於下月訪問中國，屆時會到上海參觀。雖然不少評論認為，兩國貿易糾紛頻生，不利中美關係，但阿莊對此不過分擔心，事關今時唔同往日，依家美國都識得分莊閒，對中國呢位超級大債主，任何不友善嘅行動都要適可而止。

昨日三隻新股登場，其中以澳優乳業（01717）表現最佳，收報5.1元，較招股價升27.5%；至於盈德（02168）及中國鐵鈦（00893）分別較招股價上升12%及5.1%。聽講未來幾個月有多家內房企業喺中、港兩地上市，若然市況利好，現成內房股亦可受惠，前日本欄推介嘅中國海外（00688），值得多加關注。

近日高盛證券將明年本港住宅及寫字樓價格及租金預測調高，其中本港一、二手住宅樓價預測增幅，分別由原來嘅15%及10%，上調至20%及15%，寫字樓租金增幅由原來嘅5%上調至10%，零售租金增長預測則維持喺5%。因應有關調整，該行同時上調多隻地產股嘅預測每股盈利及目標價。

由此睇嚟，近日恒隆地產（00101）股價創五十二周新高，確係有其原因。食住呢條水，短線可以留意新地（00016）、長實（00001）及信置（00083）正股及相關衍生工具嘅表現。

全年業績可望轉盈

此外，樓市交投暢旺，做地產代理嘅美聯（01200）亦係受益者。今年上半年，美聯嘅業績回穩，營業額15.43億元，同比只係微降5.1%，純利增加78.9%至2.72億元。由於住宅物業代理業務乃其主要收益來源，喺資金不斷湧港下，第三季樓市保持暢旺，相信下半年樓市可保價、量齊升嘅格局，美聯嘅全年業績應可由虧轉盈。

美聯昨日收報6.63元，市值48億元，假設下半年盈利與上半年相若，現價預測市盈率約九倍，估值並不昂貴。若如高盛所言，明年樓市可再看高一線，照計美聯現價亦具吸引力。再看其股價走勢，從三月份低位反覆回揚，上升趨勢延續，下站目標見8元，向下宜守50日線5.9元。