本文重點
近排天災特別多，先有超級颱風凱薩娜先後吹襲菲律賓、越南及柬埔寨，跟住印尼又接連發生大地震。啱啱宣布將行政總裁辦公室搬嚟香港、大力發展亞洲新興市場嘅滙控（00005）就好識做，即時捐30萬美元（約234萬港元）畀紅十字會搞亞洲賑災。
受到金融海嘯影響，滙控自己都要集資自救，不過眼見多國受天災影響，滙控亦義不容辭捐錢賑災。記得去年內地「五．一二」地震嗰陣，滙控都即時捐出1,000萬人仔賑災。
滙控管理層成日強調世界嘅重心會由西轉向東，佢哋喺亞洲有咁多業務，仲頂起咗成個集團喺美國嘅虧損，出現天災人禍當然要捐番啲錢，盡吓企業責任。記得去年滙控用幾億美元買咗印尼Bank Ekonomi，將當地分行網絡擴大至190多個網點。
設專戶收集捐款
正如滙控亞太區行政總裁霍嘉治所講，佢哋知道人命傷亡難以彌補，但希望捐款可為救災提供一啲支援。太子知道，滙控仲設立咗專戶收集亞太區職員嘅捐款。