第三季港股一共升咗2,577點或者14%，低於第二季嘅4,802點，相信唔少人都覺得第三季港股難玩，唔少二、三線股早在八月初，升勢已無以為繼，大市成交亦愈玩愈縮，由七月底最高紀錄的1,017億元，到今日少咗一半有多，指數不跌，完全係靠大笨象（00005）單天保至尊，睇番滙控第三季升幅37.8%，為恒指貢獻960點，相當於期間升幅嘅三分之一。

新股定價高攞嚟衰

臨近第三季尾，新股熱有減退迹象，掛牌後股價更有「鬥衰」的趨勢，第三季最後一隻上市的華南城（01668），首日收市報1.62元，比招股價2.1元跌兩成三之多，新股孖展客恐怕今次都損失慘重。

史提芬從來極少推薦認購新股，而今次單係睇華南城嘅招股價，已隱隱覺得有點問題，事關招股價範圍居然闊到去1.4至2.1元，這情況令認購股民十分被動，隨時要比下限價高出五成接貨，假如管理層可接受1.4元為最低集資界線，點解股民要畀額外的0.7元？尤其近期新股掛牌一隻衰過一隻，配售反應一般，公司「夾硬」要上限定價，無疑係殺雞取卵之舉。

回顧第三季表現最差嘅恒指成分股，竟然是中國海外（00688），累計跌11.8%，把尾二的長江基建（01038）彈開一條街，着實令人有點意外。

估值較同業高一截

論質素，中國海外屬於少數擁有覆蓋全國網絡的地產發展商，品牌知名度高，但優勢在估值上也充分反映，股價16.76元，足足是每股資產淨值的3.59倍，即使經過大行重估，年底每股帳面值增加至接近5元，溢價仍然達3.4倍，較富力（02777）、華潤置地（01109）的2.3至2.4倍高一截。近期市場驚傳內地新增貸款分段收緊，甚至會喺明年初調高利率，高溢價的中海，自然也首當其衝。

商譽溢價高其實唔係無着數，至少收購低市帳率資產時，就可即時將估值拉低，如果透過高PB印公仔紙買低PB資產，更妙。最近中海似乎想趁內房股有點降溫，積極入市，首個目標係近年染指內地物業投資的蜆壳（00081），當然對市值達1,370億元嘅中海來說，呢項投資濕濕碎，但對補充土儲長遠意義重大，若十月份股價有機會回到15至16元水平，中長線投資者不妨留意。