內地市場要實現全年「保八」目標，基本上已不成問題，末季經濟表現，對明年經濟及政策走向嘅啟示作用較大。事實上，中央拋出嘅4萬億元人民幣救市方案，今年係關鍵嘅投資年，到咗明年，彈藥用得七七八八，持續見效自然好，最怕係效用不持久，到時又要睇祖國如何拆招！

放大圖片	放大圖片	放大圖片

內地互聯網產業發展迅速，造就不少大富翁和超級企業，騰訊（00700）係其中一家。講到互聯網產業，內地網遊市場蓬勃發展，確令人眼前一亮。今年上半年，各大內地網遊股嘅業績表現亮麗，喺與金融海嘯嘅陰影相比之下，網遊股更顯光芒。騰訊股價自七月份突破100元大關後，頭也不回，上周五收市報126.1元。阿莊喺百元關前沽出獲利，雖然係賺錢走，但買唔番呢隻「股王」，亦覺可惜。

貨源盡落強者手

展望未來數年，內地3G手機嘅應用將會日趨普及，這龐大增值服務市場嘅發展潛力難以估量。騰訊既已於內地互聯網增值服務市場建立「霸主」地位，未來可望喺內地積極扶持創意文化產業發展，以及流動電訊增值服務需求激增之下，進一步壯大。對於一間身處高增長行業嘅公司，阿莊亦承認股價難以估頂，當日落車實在落得太早。

今年上半年，騰訊經營業務現金流淨額達到35億元人民幣，盈利增長前景明朗，未來大有條件調高派息，所以見到基金對佢死心塌地。早前騰訊高管減持股份，但無礙股價升勢，好明顯貨源已盡落強者手。公司將於十一月公布第三季度業績，相信可以再次以佳績示人，睇睇可唔可以喺110元或樓下再次上車。