今年以來，本地樓市暢旺，樓價飆升，就連阿莊亦感到意外。歸根究柢，內地同胞不斷攞錢嚟香港掃樓，加上利息低企，資產價格上升，吸引更多市民轉租為買，都係樓市不衰嘅原因。

預計未來數年，住宅市場供應不會大增，加上即使利息回升，亦只會係溫和有序。只要區內經濟保持穩定，估計嚟緊一年，本港樓價雖有波動，但就未有大跌之虞。若然通脹升溫，揸磚頭亦係保值之道。

講起樓市，專做收購舊樓生意嘅田生集團（08136），早前宣布業績，截至今年六月底止十五個月，收入為1.18億元，純利2,362萬元，末期息每股0.366仙。

阿莊認為，這份業績期內，正好是金融海嘯發生的時間，而且年結日未及全面反映近季樓市升勢，特別係最近田生旗下唔少收購項目有新進展。據其管理層近日披露，今年首九個月，公司完成收購八個舊樓項目，收購價18億元，並預期全年收購金額將大增至85億元，項目增到20至22個。若悉數重建後，可提供逾200萬平方呎樓面面積。

受惠放寬收樓限制

如無意外，年底前立法會將審議政府提出放寬舊樓強制收購條例嘅建議，具體內容係擬將五十年或以上舊樓嘅強制拍賣門檻，由以往需取得九成業權降至八成。若然順利通過，勢必有助加快私人重建步伐。

翻查資料，前年公司收購田生地產嘅時候，主要股東承諾喺收購事項完成後的十二個月期間，於支付應付田生地產管理層之花紅（如有）前及任何經常性或特殊項目後，可取得經審核純利為1.5億元，可惜去年遇上金融海嘯，履行溢利保證期限亦延後，而去年六月雙方就新保證盈利訂立補充協議，期限改為由去年七月起三十六個月內。

以目前田生手頭項目規模，若進展順利，應有能力兌現保證盈利。再看公司截至今年六月底止，手頭現金及等值2.47億元，每股資產淨值0.27元，資產負債比率為零。以現價0.365元計，進場風險有數得計，睇好舊樓重建市場，此股屬刀仔鋸大樹之選。